Military Forces of the Republic of Armenia

[Vrej1915]

Re: Military Forces of the Republic of Armenia

Տավուշի երկու բնակիչ անցել են Ադրբեջանի սահմանը. հայկական կողմը լուրը պեշտոնապես դեռ չի հաստատում
18/03

Ադրբեջանական լրատվամիջոցների փոխանցմամբ՝ վերջին երկու օրում Հայաստանից Ադրբեջանի տարածք են անցել Հայաստանի երկու քաղաքացիներ:
Ըստ այդմ, մարտի 16-ին Ադրբեջանի Ղազախի շրջանում սահմանը հատել է Հայաստանի Տավուշի մարզի Դովեղ գյուղի բնակիչ, 87-ամյա Դուրմիշ Քառյանը, իսկ հաջորդ օր՝մարտի 17-ին, Այգեհովիտ գյուղի բնակչուհի, 48-ամյա Անահիտ Առաքելյանը:
panorama.am-ը գրում է, որ ԱԱԾ լրատվական կենտրոնի ղեկավար Արծվին Բաղրամյանից տեղեկությունը հաստատել չհաջողվեց` նա հեռախոսազանգերին չէր պատասխանում: Իսկ Դովեղի գյուղապետ Սամվել Գորգինյանը Panorama.am-ի թղթակցի հետ զրույցում ասել է, որ գյուղի բնակիչներով փնտրում են 87-ամյա Քառյանին, բայց գտնել չի հաջողվել:
"Սահմանը հատելու մասին պաշտոնապես որևէ տեղեկություն չունենք, բայց նրան գյուղով մեկ` անտառում ու այլ տեղերում փնտրում ենք", -ասել է գյուղապետը` միևնույն ժամանակ չբացառելով սահմանը հատելու մասին վարկածը:

Գյուղապետի խոսքով, գյուղի մեծահասակ բնակիչը առաջին անգամ չէ, որ կորում է. -"Մի անգամ Արտաշատ էր գնացել, մի անգամ Թեղուտ: Դրա համար ենք ամեն տեղ ման ենք գալիս":

Ի դեպ` ըստ գյուղապետի, Դովեղ գյուղի վերոնշյալ բնակչի անունը Մանցական Քառյան է:

Ինչ վերաբերում է Այգեհովիտ գյուղի բնակիչ 48-ամյա Անահիտ Առաքելյանին, ապա նրա քրոջ որդին մեզ հետ զրույցում ասաց, որ իրենք էլ հստակ չգիտեն` Անահիտը սահմանն է անցել, թե ոչ:

"Անցնել-չանցնելը 100 տոկոսանոց պարզ չի, որ ասենք` անցել ա: Ուղղակի երեկ ճաշից հետո ինքը (Անահիտ Առաքելյանը-հեղ.) չկա, մենք էլ ընգել ենք, ման ենք գալիս, չկա: Չի կարա անցնի, քանի որ պոստերում շատ լուրջ ծառայություն ա, գնացել ենք պոստեր տղերքին տեսել ենք, ասել են` չի անցել: Հիմա մենք սահմանում ենք ապրում, մտածում ենք` կարող ա անցած լինի: Բայց պոստի տակի մասը մի քիչ խաղողի այգի ունենք, ինքն ըտեղ էրևացել ա, բայց ըտեղ մինի պոլյա կա, ականապատված ա, բայց եթե անցած լիներ, կպայթեր",- իրավիճակը ներկայացրեց Անահիտի բարեկամը` Արթուրը:

Նրա խոսքով, Անահիտ Առաքելյանի մոտ գարնանը նյարդային սրացումներ են լինում:
Նշենք, որ ըստ ադրբեջանական լրատվամիջոցների, ամենայն հավանականությամբ, Հայաստանի երկու քաղաքացիներն առաջիկա օրերին պետք է վերադարձվեն Հայաստանին:

[Vrej1915]

Re: Military Forces of the Republic of Armenia

Ադրբեջանի բանակի բացը կարող մարդուժն է, Հայաստանինը՝ կոռուպցիան վիդեո
. 18/03

Թե՛ Հայաստանը, թե՛ Ադրբեջանը յուրաքանչյուր տարի զգալի ֆինանասական միջոցներ են հատկացնում ռազմական ոլորտին: Սակայն Ադրբեջանի ծախսերն անհամեմատ ավելին են, իսկ բանակի մարտունակությունը զգալիորեն զիջում է Հայաստանին: Այս տվյալները "Ռազմական հավասարակշռություն" ամենամյա զեկույցից են, որը հրապարակել է "Ռազմավարական հետազոտությունների միջազգային ինստիտուտը": Ընդ որում, սա առաջին եւ միակ զեկույցը չէ, որտեղ Ադրբեջանը, չնայած հզոր ծախսերին, ռազմական ունակություններով, հմտություններով ու բանակի ներուժով զիջում է Հայաստանին:
Եթե Հայաստանը ռազմական ոլորտին նախորդ տարի հատկացրել է շուրջ 400 մլն դոլար, ապա Ադրբեջանը` 1 միլիարդ 770 միլիոն` 90 միլիոն դոլարով ավելի՝ 2011 թվականի ծախսերից: Ադրբեջանը ռազմական ծախսերին հատկացնում է երկրի ՀՆԱ-ի շուրջ 2,5 տոկոսը: Մեծ Բրիտանիայում գործող "Ռազմավարական հետազոտությունների միջազգային ինստիտուտը" "Ռազմական հավասարակշռություն" խորագրով ամենամյա զեկույցում արտացոլել է Ադրբեջանի ահագնացող ռազմական ծախսերը, միաժամանակ փաստելով, որ այդ ծախսերի հետեւում չկա այն մարդուժը, որը պետք է ձեռք բերված տեխնիկան օգտագործի: Զինվորներ, իհարկե, կան, բայց Ադրբեջանի պարագայում զինվորի առկայությունը մարտունակության հետ կապ չունի: Դա են փաստում զեկույցի հեղինակները` համեմատելով երկու զինված ուժերը:
"Հայաստանի զինված ուժերը բավականին հմուտ են եւ հստակ պատկերացնում են իրենց առջեւ դրված նպատակներն ու առաջադրանքները: Դրան զուգահեռ, Հայաստանի Զինված ուժերում գնալով աճում է պայմանագրային հիմունքներով ծառայության անցնող զինվորականների թիվը, թեեւ պահպանվում է նաեւ պարտադիր զորակոչը",- ասված է զեկույցում։

Փորձագետներն անդրադարձել են նաեւ հայկական բանակում իրականացվող բարեփոխումներին` նշելով, որ բարեփոխումները հիմնականում ուղղված են պայմանագրային զինծառայողների թվի ավելացմանն ու ավելի որակյալ սպառազինության ձեռք բերմանը:

Ի դեպ, այս առումով, չնայած բարեփոխումներին, կան խնդիրներ, որոնցից թերեւս, գլխավորը կոռուպցիան է: "Ռազմավարական հետազոտությունների միջազգային ինստիտուտն", անդրադառնալով հայկական ու ադրբեջանական զինված ուժերի շփման գծում առկա իրավիճակին, փաստում է, որ 2012թ. առնվազն երկու անգամ հակամարտության գոտում իրադրությունը խիստ լարվել է, ինչը, սակայն, չի հանգեցրել տարածաշրջանում ռազմական գործողությունների վերսկմանը: Զեկույցի ադրբեջանական բաժնում խոսվում է ահռելի ծախեսերի մասին, որոնք նաեւ անարդյունավետ են, քանի որ հիմնական շեշտը դրված է տեխնիկա ձեռք բերելուն: Չնայած որ Ադրբեջանի ռազմական բյուջեն մի քանի անգամ գերազանցում է Հայաստանի ռազմական ծախսերը, այդուհանդերձ, այդ հանգամանքն արբեջանական բանակն ավելի մարտուկ չի դարձնում:

"Նավթի վաճառքից ստացված շահույթի շնորհիվ Ադրբեջանը կարողացել է զգալի քանակությամբ սպառազինություն ձեռք բերել, սակայն Ադրբեջանի զինված ուժերն օդային տարածքում չեն կարողանում հասնել միանշանակ առավելության: Նույն նավթն Ադրբեջանին հնարավորություն է տվել գնել S-300 տեսակի նորագույն համակարգեր (զենիթահրթիռային), սակայն, դեռևս հստակ չէ, թե դա մարտունակության բարձրացման տեսանկյունից ինչ է տալիս Բաքվին",- ասվում է զուկույցում։

Ի դեպ, ըստ փորձագետների, այդ թվում` ադրբեջանցի, Ադրբեջանը հիմնականում ձեռք է բերում տեխնիկա, որոնք օգտագործվել են ԽՍՀՄ նախկին տարածքի երկրներում, անցել է պիտանելիության ժամկետը եւ միակ արժեքն այն է, որ որպես ռազմական տեխնիկա, դեռ դուրս գրված չեն:

http://www.yerkirmedia.am/?act=news&lan=hy&id=13012#video

[Vrej1915]

Re: Military Forces of the Republic of Armenia

ՕԴԱՅԻՆ ՏԱՐԱԾՔՆԵՐԸ ՊԱՇՏՊԱՆՎԱԾ ԵՆ
Գաղտնիք չէ, որ հակաօդային պաշտպանության զորքերն այսօր հայոց ազգային բանակի ամենակարևոր և ամենամարտունակ ստորաբաժանումներից են։ Դեռևս Արցախյան ազատամարտի և բանակաշինության առաջին փուլում պարզվեց, որ մենք պարտավոր ենք ունենալու անխոցելի ՀՕՊ համակարգ, որն իր էությամբ գերազանցապես պաշտպանական զորատեսակ է։

Նախկին ԽՍՀՄ բանակի հայ մասնագետ սպաների և զորամասերը համալրող գիտության ու արտադրության ներկայացուցիչների ջանքերով խնդիրը լուծվեց կարճ ժամանակահատվածում։ Նորանկախ հանրապետության ու բանակի ղեկավարները, ստեղծելով հուսալի հակաօդային պաշտպանություն, ոչ միայն ամրապնդում էին երկրի պաշտպանունակությունը, այլև գործով միջազգային հանրությանն ապացուցում էին, որ Հայաստանը, ի տարբերություն իր որոշ հարևանների, զերծ է ագրեսիվ նկրտումներից, որ որդեգրել է հարևանների հետ խաղաղ գոյակցության քաղաքականությունը և բանակն էլ կառուցում է գլխավորապես պաշտպանության, պետության ու ժողովրդի խաղաղությունն ապահովելու հենքի վրա։ Այս քաղաքականությունը շարունակվում է մինչև այժմ։ Իսկ կատարվող աշխատանքների արդյունավետությունը, զորատեսակի մարտունակությունն ստուգվում է ինչպես մեր երկրում, այնպես էլ ՌԴ և ԱՊՀ այլ երկրների ՀՕՊ զորքերի հետ համատեղ անցկացվող զորավարժությունների ընթացքում։

♦♦♦

Գնդապետ Ս. Գրիգորյանը համակարգի փորձառու ու ճանաչված մասնագետներից է։ Նրա հրամանատարությամբ միացյալ հրամանատարական կետը երկու անգամ լավագույնն է ճանաչվել զորատեսակի կազմում։ Նա ևս երկու անգամ պատվո դրոշի է արժանացել ներկայիս մարտական զորամասի անձնակազմի հետ։ Երկրորդը և առայժմ վերջինը անցած՝ 2012թ. աշխատանքների գնահատականն է։ Լինելով զորամասում՝ գնդապետ Ս. Գրիգորյանի հետ զրուցեցինք ստորաբաժանման առջև դրված գլխավոր խնդրի, այսինքն՝ օդային տարածքների պաշտպանվածության, զորամասի ձեռքբերումների, առաջիկա ծրագրերի, մարտական հերթապահության իրականացման, սպառազինության շահագործման, ռազմական ուսուցման, կադրային քաղաքականության, զորանոցային պայմանների բարելավման, անձնակազմի բարոյահոգեբանական վիճակի մասին։

ՄԱՐՏԱԿԱՆ ՀԵՐԹԱՊԱՀՈՒԹՅՈՒՆ

-Մեր զորամասը կարևոր ներդրում ունի բանակի ընդհանուր հաջողություններում։ Սկսած 1999 թ.-ից՝ զորամասի ստորաբաժանումները պարբերաբար մասնակցել են ԱՊՀ երկրների ՀՕՊ զորքերի համատեղ զորավարժություններին, հաջողությամբ կատարել առաջադրանքները և արժանիորեն վայելում են գործընկերների վստահությունը։ Վերջին անգամ, 2011թ. սեպտեմբերին, զորամասը Աշուլուկ մեկնեց իմ ղեկավարությամբ, արդյունքները դարձյալ շատ բարձր էին, և «Հայ զինվորը» ժամանակին դրանք հրապարակել է։ Միանգամից ասեմ՝ մեր օդային տարածքների պաշտպանվածությունը լիարժեք է։

Զորամասը կատարում է շուրջօրյա մարտական հերթապահություն։ Վերահսկվում են ինչպես դրսից եկող, այնպես էլ երկրի ներսում կատարվող թռիչքները։ Բոլոր հարցերը ժամանակին կարգավորվում են քաղաքացիական ավիացիայի հետ։ Ընդհանուր ղեկավարումն իրականացվում է միացյալ հրամանատարական կետից։ Այսինքն՝ ստացվում է բազմաշերտ վերահսկողություն։

Յուրաքանչյուր ամիս միաժամանակյա մարտական հերթապահություն են կատարում զորամասի դիվիզիոններ։ Հերթապահությունից մեկ շաբաթ առաջ զորամասի հանձնաժողովը լինում է դիվիզիոններում, ստուգում պատրաստականության վիճակը, առաջադրում է խնդիրներ և տալիս մեկ շաբաթ ժամանակ այդ խնդիրները կատարելու համար։ Ամսի մեկից դիվիզիոններն ստանձնում են հերթապահությունը։ Այն տեղի է ունենում հանդիսավոր արարողությամբ, բարձրացվում է պետական դրոշը։ Մարտական հերթապահության ժամանակ դիվիզիոնի անձնակազմը մշտապես գտնվում է տեղում։ Այդ ընթացքում կազմակերպվում են բազմաթիվ հանկարծակի ստուգումներ ինչպես մեր, այնպես էլ վերադաս հրամանատարության կողմից։ Մարտական հերթապահություն կատարող դիվիզիոնները պատրաստ են ցանկացած պահի վարելու մարտական գործողություններ։ Այս ամենը չի նշանակում, թե այդ ընթացքում մյուս դիվիզիոնները չեն մասնակցում օդային տարածքների հսկողությանը։ Նրանք լինում են իրենց տեղերում և հետևում ընդհանուր իրավիճակին, գրանցում յուրաքանչյուր թռիչք, յուրաքանչյուր շարժ։

ՍՊԱՌԱԶԻՆՈՒԹՅՈՒՆԸ

-Դիվիզիոններն սպառազինված են Ս-300 և Ս-125 հրթիռային համալիրներով։ Նրանք ունեն նաև ԴԶՀՀ-ներ՝ «Իգլա» և ՀՕՊ հրանոթներ։ Ինչպես Ս-125-ի, այնպես էլ Ս-300-ի տեխնիկական սպասարկումն ամբողջությամբ իրականացնում են մեր մասնագետները։ Սպասարկման անհրաժեշտ միջոցների ավելի քան 90 տոկոսն ապահովում են մեր գործարանները։ Կան որոշ հարցեր, որոնց համար դիմում ենք հրթիռներն արտադրող մայր գործարանների օգնությանը։ Կապը դիվիզիոնների և զորամասի հրամանատարական կետի միջև շատ հուսալի է, որովհետև ներդրված են կապի ժամանակակից բոլոր միջոցները։

2012Թ. ՈՒՍՈՒՄՆԱԿԱՆ ՏԱՐԻՆ

-Ավանդաբար ուսումնական փուլերի համար պլանավորվում են զորավարժություններ։ Մեզ համար շատ կարևոր են ավիացիայի շրջաթռիչքներով ուղեկցվող զորավարժությունները։ Անցած տարի ունեցել ենք նմանատիպ զորավարժություններ, որոնց ժամանակ հայտնաբերվել և պայմանականորեն ոչնչացվել են բոլոր թիրախները։ Զորամասը գրեթե ողջ անձնակազմով մասնակցեց ՀԱՊԿ անդամ երկրների ԱԱՀՈՒ-ի «Փոխգործակցություն-2012» զորավարժությանը, որի ժամանակ նույնպես առաջադրանքները կատարվեցին ամբողջությամբ։ Դրանից հետո սկսվեց համաբանակային հրամանատարաշտաբային ռազմավարական զորավարժությունը, և դարձյալ ունեցանք նույն հաջողությունը։ Մինչ այդ, ամռանը զորամասում ստուգողական պարապմունքներ անցկացրեց պաշտպանության նախարարության հանձնաժողովը։ Նման ստուգումներ լինում են ամեն տարի։

Ինչպես գիտեք, ամեն տարի աշնանը զորատեսակների համար կազմակերպվում են մասնագիտական մրցույթներ։ Անցած տարի Ս-125-ի մրցույթում հաղթողներ են դարձել փոխգնդապետ Գ. Պետրոսյանի հրամանատարությամբ գործող դիվիզիոնի մարտկոցները։ Ս-300-ի մրցույթում էլ լավագույններից մեկը փոխգնդապետ Ա. Հակոբյանի դիվիզիոնի հաշվարկն էր։

ԶՈՐԱՀԱՎԱՔԱՅԻՆ ՈՒԺԵՐԸ

Հրամանատարաշտաբային զորավարժության ժամանակ զորամասերից շատերն ստացան անհրաժեշտ համալրում, բայց մեզ համար նման հրաման չկար։ Զորահավաքային ուժերի ճշտումը տեղի ունեցավ զինկոմիսարիատներում։ Կան, հավաք են, պատրաստ են այն ուժերը և միջոցները, որոնք անհրաժեշտության դեպքում համալրելու են զորամասի դիվիզիոնները։

ԸՆԹԱՑԻԿ ՈՒՍՈՒՄՆԱԿԱՆ ՏԱՐԻՆ

-Բավականին լավ ենք սկսել, կատարում ենք պլանային և արտապլանային բոլոր միջոցառումները։ Սպասվում է շրջաթռիչքներով զորավարժությունը։ Այս տարի դարձյալ մասնակցելու ենք ՌԴ զորավարժարանում տեղի ունենալիք ԱՊՀ ՀՕՊ զորքերի համատեղ զորավարժությանը։ Նախատեսել ենք ընդգրկել երիտասարդ մասնագետներին, նրանց, ովքեր դեռևս չեն մասնակցել այդպիսի զորավարժության։ Արդեն սկսել ենք անձնակազմերի ձևավորումը։ Նրանց հետ պետք է նաև որոշակի նախապատրաստական աշխատանք կատարվի։ Հավանաբար կլինեն նաև այլ զորավարժություններ։

ՄԱՍՆԱԳԻՏԱԿԱՆ ՊԱՐԱՊՄՈՒՆՔՆԵՐ

-Մասնագիտական մշտական պարապմունքները պարտադիր են։ Ամիսը մեկ սպայական ուսումնական խմբերի համար կազմակերպում ենք հրամանատարական պարապմունքներ, դրանից բացի, սպայակազմն ընդգրկվում է մասնագիտական հավաքներում, որոնց առաջին փուլն անցկացվում է զորամասում, հաջորդը՝ վարչություններում, այսինքն՝ կապավորները՝ կապի վարչությունում, թիկունքայինները՝ թիկունքի, բժիշկները՝ բուժվարչությունում…

Զորամասի հրամանատարական կազմը պարբերաբար, ստույգ՝ ամիսը մեկ անգամ, ստուգում է դիվիզիոնների ստորաբաժանումների մասնագիտական գիտելիքներն ու հմտությունները, իսկ ուսումնական փուլի վերջում ընդունում է ստուգարքներ և քննություններ։ Դիվիզիոններում ստուգումներ են անցկացնում նաև պաշտպանության նախարարության և գլխավոր շտաբի վարչությունները։

ՀԱՄԱԳՈՐԾԱԿՑՈՒԹՅՈՒՆԸ

Մարզումների միջոցով համագործակցում ենք մյուս ՀՕՊ զորամասերի հետ, որպեսզի հնարավոր մարտական գործողությունների ընթացքում իմանանք մեր անելիքները և նույն թիրախի վրա ավելորդ հրթիռ բաց չթողնենք։

ԶԱՐԳԱՑՄԱՆ ԾՐԱԳԻՐ

-Ունենք այդպիսի ծրագիր բոլոր ծառայությունների գծով, ինչը շատ կարևոր է։ Օրինակ՝ սպառազինության, կադրերի առաջխաղացման և այլնի համար։

ԿԱԴՐԱՅԻՆ ՔԱՂԱՔԱԿԱՆՈՒԹՅՈՒՆԸ

-Կարծում եմ՝ բանակում լավագույններից մեկը ՀՕՊ զորքերի համար իրականացվող կադրային քաղաքականությունն է։ Ամեն տարի արտերկրում ուսանած մեծ թվով երիտասարդ սպաներ ենք ընդունում ծառայության։ Միաժամանակ, զորամասը համալրում են մեր ռազմական ինստիտուտների շրջանավարտները։ Այս ամենից բացի, անհրաժեշտ վերապատրաստությունից հետո, ծառայության ենք ընդունում հանրապետության բուհերի այն շրջանավարտներին, ովքեր գտնում են, որ իրենց տեղը բանակում է։ Զորամասն անցել է պայմանագրային ծառայության, ուստի, միայն ուսումնական զորամասից են գալիս պարտադիր ժամկետային ծառայության զինվորներ։

Գնդապետ Ս. Գրիգորյանը նաև անդրադարձավ զորանոցաշինությանը և նշեց, որ դիվիզիոնների մեծ մասն արդեն տեղավորվել է նորակառույց զորանոցներում։ Եվս երկու նորակառույց, և զորամասում այդ հարցը հիմնավորապես կլուծվի։

Զրուցեցինք նաև բարոյահոգեբանական վիճակի, գաղափարադաստիարակչական աշխատանքների, հաճախակի կազմակերպվող մարզամշակութային միջոցառումների մասին։

ՀՐԱՄԱՆԱՏԱՐԱԿԱՆ ԿԵՏՈՒՄ

Այստեղ աշխատանքը ոչ մի ակնթարթի չի ընդհատվում։ Հեռախոսավարուհի, շարքային Կարինե Ավետիսյանը հաղորդագրություններ է ընդունում և ուղարկում, գծագրավար, շարքային Արծվիկ Ադունցը ցույց է տալիս տարածաշրջանում անցնող ինքնաթիռների տեղը, նշում թռիչքի բարձրությունը, հեռավորությունը։ Այս ամենին ակնդետ հետևում է օպերատիվ հերթապահ, մայոր Հայկ Կարապետյանը, իսկ մարտական հաշվարկում ընդգրկված էին կապիտան Գառնիկ Թանգյանը, ավագ լեյտենանտներ Արտյոմ Գրիգորյանը, Հրաչ Սիմոնյանը և լեյտենանտ Հմայակ Մելիքսեթյանը։ Հրամանատարական կետի պետը փորձառու, ԱՊՀ երկրների մի քանի համատեղ զորավարժությունների մասնակից փոխգնդապետ Արմեն Սուքիասյանն է։

-Հենց այստեղից ենք ղեկավարում դիվիզիոնների աշխատանքը, եթե հանկարծ սահմանի խախտում լինի, և մեր երկրի օդային տարածք մտնի թշնամական որևէ ինքնաթիռ, այստեղից ենք արձակելու հակառակորդին ոչնչացնելու հրամանը։ Դիվիզիոններից մի մասի հետ կապն ավտոմատացված է, մյուսների հետ՝ ոչ։ Այստեղ ծառայողները, հերթապահություն կատարողները շատ լավ են տիրապետում մասնագիտությանը, իսկ ծառայական կարգապահության խախտման դեպքերը բացառված են։

Իրոք, հրամանատարական կետը զորամասի սիրտն է, և ամենևին էլ պատահական չէ, որ հենց այստեղ են պահվում զորամասի մարտական դրոշը և զորատեսակի մեջ լավագույնի կոչումը հաստատող պատվո դրոշը։

ԱՐԱՄ ՆԵՐՍԻՍՅԱՆ
փոխգնդապետ
Լուսանկարները՝ հեղինակի

[Vrej1915]

Re: Military Forces of the Republic of Armenia

http://razm.info/10904

[Vrej1915]

Re: Military Forces of the Republic of Armenia

Սեյրան Օհանյանն իր՝ ոստիկանության համակարգ տեղափոխվելու մասին
20 Մարտի 2013 - 18:00

«Ես էությամբ զինվոր եմ և պատրաստ եմ ցանկացած տեղ ծառայելու, որտեղ որ հանրապետության նախագահը կորոշի: Իրականում ես ոչ մի բանից տեղյակ չեմ, և ես իմ պարտականությունները կատարում եմ: Հանրապետության նախագահն էլ իր ելույթի մեջ ասաց, որ մեծ փոփոխությունների չի գնալու: Դա իր իրավասության շրջանակներում է»,- այսպես պատասխանեց Պաշտպանության նախարար Սեյրան Օհանյանը ԱԺ-ում լրագրողների այն հարցին, թե ճիշտ են արդյո՞ք այն տեղեկությունները, որ նա դառնալու է ոստիկանության համակարգի աշխատող։
Հարցին, թե ավելի շատ կցանկանար մնալ Պաշտպանության նախարարի պաշտոնո՞ւմ, թե՞ ոստիկանություն տեղափոխվել, նա պատասխանեց. «Եթե գիտեք, տեղյակ եք իմ կենսագրության մասին՝ ինչպիսի մասնագիտության տեր անձնավորություն եմ եղել և այսօր էլ ղեկավարում եմ Պաշտպանության նախարարությունը, իհարկե, այն ավելի հոգեհարազատ է ինձ համար ոչ միայն որպես մասնագիտություն, այլ նաև այն, որ պատվավոր պաշտոն է, գործը հայրենիքի պաշտպանության վերաբերյալ է և այսօր իմ կատարած աշխատանքը հիմք է տալիս ասելու, որ դեռևս աշխատելու տեղ ունենք»:

HayNews.am

[Vrej1915]

Re: Military Forces of the Republic of Armenia

Երեք կորուստ Ադրբեջանի բանակում մեկ շաբաթում
Մարտ 21, 2013 by Անի Մարգարյան


Ադրբեջանի ՊՆ մամլո ծառայությունը մարտի 10-ին հաղորդել է, որ շփման գծում Բեյլագանի ուղղության վրա [խոսքը Հորադիզի հատվածի մասին է. Ռազմինֆո] «հայ դիպուկահարի գնդակից» զոհվել է 1994թ. ծնված Աբիլով Ալի Իլհամ օղլուն: ՀՀ ՊՆ խոսնակը ապատեղեկատվություն է անվանել ադրբեջանցիների պնդումը հայ դիպուկահարի մասին:

Մարտի 13-ին ադրբեջանցի մեկ այլ զինծառայող, ենթասպա Ռոման Իսլամ օղլու Մամեդովը (ծնվ, 1986 թ.) զոհվել է Նախիջևանում Ջուղա-Օրդուբադ ճանապարհին տեղի ունեցած ավտովթարի հետևանքով։

Երրորդ կորուստը գրանցվել է մարտի 16-ին. մահացել է սահմանապահ զորքերի զինծառայող Միրիև Էլվին Ֆիքրեթօղլուն։ Սակայն ըստ մահացածի ազգականներից Ուլվի Գուլիևի՝ Միրիևին սպանել է նրա հրամանատարը՝ աթոռակով հարվածելով, երբ զինվորը քնած է եղել: Հիշեցնենք, որ Ուլվի Գուլիևը քաղբանտարկյալ էր։

Նախնական տեղեկության համաձայն՝ զինվորը զոհվել էր հրազենային վնասվածքից, սակայն Սահմանապահ ծառայության հաղորդագրության մեջ խոսվում է Միրիևի վատ ինքնազգացողության ու արյան ցածր ճնշման մասին: Ռազմական դատախազի ներկայությամբ իրականացված դիահերձման ժամանակ ոչ մի արտաքին ու ներքին վնասվածք չի հայտնաբերվել: Մինչ շարունակվում է Միրիևի գործի հետաքննությունը, ադրբեջանական մեդիադաշտում տարածվում են վերջինիս դին պատկերող լուսանկարները:

Ընդհանուր առմամբ տարվա սկզբից Ադրբեջանի ուժային կառույցներում տարբեր պատճառներով մահացել է 14 մարդ:

Ադրբեջանի՝ «Լրագրողների ազատության և անվտանգության ինստիտուտ» ՀԿ մեդիա-կենտրոնում տեղի ունեցած «Վերջ զինվորների մահին» քննարկմանը մասնակցած զոհված զինծառայողների ծնողները նույնպես իրենց զավակների կորստի մեղավոր են համարում երկրի ռազմական ղեկավարությանը, ի դեմս` պաշտպանության նախարար Սաֆար Աբիևի և գլխավոր շտաբի պետ Նաջմեդդին Սադիխովի: Նրանք դժգոհել են նախարարության արհամարհական վերաբերմունքի, զինվորների մահվան դեպքերը կոծկելու, դատավարությունների դանդաղ ընթացքի առնչությամբ, փոխարենը՝ իրենց երախտագիտությունը հայտնելով կիրակնօրյա բողոքի ցույցի կազմակերպիչներին՝ վկայելով, որ ցույցը քաղաքականացված չէր:

Իր հերթին Ադրբեջանի ղեկավարությունը բանակում կորուստների աճի խնդիր չի տեսնում։ ՆԳՆ ղեկավար Ռամիլ Ուսուբովը Ադրբեջանի ներքին զորքերի ստեղծման 21-րդ տարեդարձի միջոցառման ժամանակ ասել է, որ Facebook-ում բողոքի ցույցերին մասնակցելու կոչեր տարածողները փորձում են խախտել Ադրբեջանի կայունությունը։ «Որոշ ուժեր առանձին վերցրած ընտանիքների ողբերգությունն օգտագործելով սեփական քաղաքական ձգտումներում` հրահրում են երիտասարդությանը՝ բողոքել բանակի դեմ՝ սերմանելով անվստահություն բանակի նկատմամբ, բայց դրանք ապարդյուն փորձեր են», — հայտարարել է նա:

Ռազմական-գիտական ուսումնասիրությունների կենտրոնի աշխատակից, գնդապետ Շաիր Ռամալդանովը, ով կորուստների մեծ թվով աչքի ընկնող Շամքորի կորպուսում հրամանատար է եղել նախկինում, պատասխանելով «Azadlyg» ռադիոկայանի լրագրողի հարցերին, հայտարարել է, որ ամենաքիչ կորուստներն Ադրբեջանի բանակում են, և, որ որևէ այլ տեղ միջադեպերի հետաքննությունն այնպես բծախնդիր չի տարվում, ինչպես Ադրբեջանում։ Հայտարարությունների հիմնավորում Ռամալդանովն այդպես էլ չի ներկայացրել, ավելին՝ նա անպատասխան է թողել լրագրողի մի քանի հարցեր, նաև՝ տվել թեմային չվերաբերող պատասխաններ:

[Vrej1915]

Re: Military Forces of the Republic of Armenia

Երեւանում կայացել է "Միացում" ֆիլմի պրեմիերան. Լաչինի ազատագրման պատմություն՝ բացառիկ կադրերով վիդեո
25/03

http://www.yerkirmedia.am/?act=news&lan=hy&id=13147#video

"Մոսկվա" կինոթատրոնում այսօր կայացել է Սամվել Թադեւոսյանի "Միացում" ֆիլմի պրեմիերան: Ռեժիսոր, սցենարիստ Սամվել Թադեւոսյանն ասում է, որ սա Լաչինի` ներկայիս Բերձորի, ազատագրման ու արցախյան հաղթանակների տարեգրություն է՝ ներկայացված բացառիկ ճշգրտությամբ:
Ֆիլմում առաջին անգամ էկրան կբարձրանան բացառիկ կադրեր արցախյան տարեգրությունից: 7 ամսվա աշխատանք, 50 րոպե տեւողություն, բացառիկ, երբեւէ չցուցադրված կադրերով "Միացում" ֆիլմն այսօր դիտում է հանդիսատեսը:
1992-ի մայիսի 18-ին Հայաստանն ու Արցախը կապվեցին իրար` Լաչինի միջանցքով: 3 տարվա շրջափակումից հետո Արցախի ինքնապաշտպանության ուժերը ստիպված էին նոր ճանապարհ հարթել Լաչին մտնելու համար, որովհետեւ միակ կամուրջը ադրբեջանցիները պայթեցրել ու հեռացել էին: Սամվել Թադեւոսյանը Դուշման Վարդանի վաշտի հետ անձամբ է տեսել ու նկարահանել նոր ազատագրված Լաչինը:

Ֆիլմը փաստերով հակադարձում է ադրբեջանական սուտ տեղեկատվությանը, թե հայերը Լաչինում կոտորած են արել: Առաջին անգամ օգտագործվել է Ադրբեջանի ազգային հերոս, ռազմական լրագրող Չինգիզ Մուսթաֆաեւի 16 րոպեանոց տեսանյութը, որում նշվում են ադրբեջանցի գնդապետների անունները, ովքեր հրաման են տվել լքել Լաչինը:

Չինգիզ Մուսթաֆաեւի տեսանյութում ներկայացվում է նաեւ Թուրքիայի տրամադրած օգնությունն Ադրբեջանին՝ թուրքական դեղեր, սնունդ, ծխախոտ, "Գորշ գայլեր" գրությամբ թուրքական զրահատեխնիկա:

Ֆիլմի առաջին մասի գաղափարը պրոդյուսեր Տիգրան Մանասյանինն է` Արցախի պատմությունը սկսել նախքան Քրիստոսի ծնունդը ժամանակաշրջանից, որպեսզի ապացուցվի հայկական Արցախի ճշմարտությունը:

Ֆիլմի ստեղծումն առանց դժվարությունների չի եղել, սակայն արդյունքից հեղինակները գոհ են. հայերեն ու ռուսերեն տարբերակներից բացի, շուտով կլինի անգլերենն ու թուրքերենը: Միջազգային մի քանի փառատոնների մասնակցության հայտ արդեն ուղարկված է:

[Vrej1915]

Re: Military Forces of the Republic of Armenia

Փորձագետ. Ադրբեջանի իշխանություններին ներքին խնդիրներն ավելի շատ են հետաքրքրում, քան՝ բանակի զինումը


Մարտ 27, 2013
Ադրբեջանի իշխանություններին ներքին խնդիրներն ավելի շատ են անհանգստացնում, քան՝ բանակի զինումը: Այս մասին NEWS.am-ի թղթակցի հետ հարցազրույցում հայտարարել է ռազմական փորձագետ Արկադի Գրիգորյանը:

Նրա խոսքով` դրա հերթական ապացույցն այն է, որ հարեւան երկրում պատրաստվում են մշակել պոլիմերային կորպուսով ատրճանակ: Այդ զինատեսակը նախատեսված է զինելու այնպիսի ուժային կառույցներ, ինչպիսիք են ոստիկանությունն ու ներքին զորքերը: Զենքը մշակվելու է թուրքական TISAŞ ընկերության հետ համատեղ: «Այս փաստը խոսում է այն մասին, որ Ադրբեջանի իշխանություններին ավելի շատ անհանգստացնում են ներքին խնդիրները, քան բանակի զինումը: Մեղմ ասած, նրանք հիմա բանակի համար ժամանակ չունեն»,- նշել է փորձագետը` ավելացնելով, ավելի վաղ արտաքին խնդիրներն օգտագործվում էին ներքին իրավիճակը փակելու նպատակով, բայց այժմ արդեն այդ տարբերակն էլ չի օգնում:

Ադրբեջանում վերջին ժամանակներս տարբեր բողոքի ցույցեր են անցկացվել: Հունվարին Իսմայիլ քաղաքի բնակիչները բողոքի ցույցի էին ելել բռնաապետական ռեժիմի դեմ, որն այնուհետեւ վերաճել էր ընդհարումների: Հունվարի կեսերին Բաքվի Յասամալի շրջանի փախստականները բողոքի ցույց են անցկացրել կենցաղային հարցերի անտեսման, ունեցած դժվարությունների եւ անվերջ աճող անարդարությունների դեմ: Մասնակիցները փորձել են շրջափակել ճանապարհները, սակայն ոստիկանությունը ցրել է ցուցարարներին: Անցյալ ամիս Լեռնային Ղարաբաղից փախստական մի կին`արդարության չհասնելով սեփական երկրում, օգնության խնդրանքով դիմել է Թուրքիայի վարչապետ Ռեջեփ Թայիփ Էրդողանին: Այնուհետեւ Ադրբեջանում փախստականները բողոքի ցույց են անցկացրել` պահանջելով բարելավել կենսական պայմանները: Ցույցի մասնակիցները շրջափակել էին Ադրբեջանի մայրաքաղաքի կարեւոր մայրուղիներից մեկը` Թբիլիսյան պողոտան: Ցույցն ավարտվել է ոստիկանության միջամտությունից հետո: Իսկ վերջերս Բաքվի կենտրոնում, բանակում զինվորների մահվան դեմ կազմակերպված բողոքի ցույցը եւս ոստիկանները ցրել են:

[Vrej1915]

Re: Military Forces of the Republic of Armenia

Ադրբեջանի զինված ուժերի կորուստներն անցյալ շաբաթ

Ապրիլ 1, 2013 by Անի Մարգարյան

Մարտի 25-ին ադրբեջանական «Դոկտրինա» կենտրոնը հրապարակել է տարվա սկզբից Ադրբեջանի ուժային համակարգերում կորուստների տվյալները։ Համաձայն դրանց՝ մահացածների ընդհանուր թիվը 20 է, որից միայն երեքը՝ շփման գծում։ Մնացյալ կորուստները ոչ մարտական պայմաններում են. երեքը՝ դժբախտ պատահարների, երկուսը՝ ավտովթարների, երեքը՝ ուղղաթիռի կործանման, մեկը՝ անզգուշության, երեքը՝ հիվանդության, երկուսը՝ անհայտ պատճառներով։ Զոհվածներից 16-ը ՊՆ-ի, մեկը՝ Սահմանապահ զորքերի, մեկը՝ ՆԶ-ի, մեկը՝ ԱԻՆ-ի, մեկը՝ Պետպաշտպանության հատուկ ծառայության ներկայացուցիչներ են։ Վիրավորները 14 են. երեքը տուժել են ոչ կանոնադրական հարաբերություններից։

Մարտի 26-ին Ադրբեջանի ՊՆ-ն հայտնել էր, որ զինծառայող Մեհման Սադիգովը զոհվել է հայկական կողմի փոխհրաձգության ժամանակ, սակայն չէր նշել, թե շփման գծի կոնկրետ որ հատվածում։ Հիշատակվում էր նաև հրազենային վնասվածք ստացած և հոսպիտալ տեղափոխված 19-ամյա զինծառայող Ֆարիզ Աբդուլաևի մասին։

Հաջորդ օրը Ադրբեջանի ՊՆ խոսնակ Սաբիրօղլուի խոսքերով՝ Գետաբեկի շրջանում հայկական կողմի կրակի պատճառով մայոր Ասկերով Ջեյհուն Մալիկ օղլուն վիրավորվել է։ Շեշտել է նաև, որ հայերը, իբր մեծ կորուստներ կրելով, նահանջել են։ Սակայն համաձայն ՀՀ ՊՆ խոսնակի՝ հայկական կողմից հրադադարի ռեժիմի խախտում չի եղել, և Ադրբեջանի ՊՆ հայտարարություններն իրականության հետ ոչ մի կապ չունեն։

Այս շաբաթ Ադրբեջանի ՊՆ-ից տեղեկացրել են ոչ մարտական ևս մեկ զոհի ու մեկ վիրավորի մասին։ Մարտի 24-ին Բաքվի ռազմածովային ուժերի նավաստի Մամեդով Ռուսլան Թաիր օղլուի տաբելային զենքից արձակված գնդակից որովայնի հատվածում վնասվածք է ստացել ու մահացել նավաստի Հումբաթով Ահմադ Բիննեթ օղլուն։ Միջադեպի առնչությամբ հետաքննություն է ընթանում։ Մարտի 29-ին Ջալիլաբադի շրջանի N զորամասում ծեծի և դանակահարության է ենթարկվել Գետաբեկի շրջանի բնակիչ Սուրեթ Մամեդովը (ծնվ. 1994թ.)։ Հաշվի առնելով զինվորի ծանր վիճակը՝ նրան տեղափոխել են Բաքվի հոսպիտալ։

Այսպիսով, շաբաթվա սկզբում «Դոկտրիանա»-ի հրապարակված 20 զոհերի թիվը մի քանի օրում հասավ 22-ի, վիրավորների թիվը՝ 17-ի։ Մարդու և ազատ խոսքի իրավունքներով զբաղվող «Մեդիայի իրավունքների կենտրոն» ՀԿ նախագիծ Freespace.az կայքն անդրադարձել է բանակում կասկածելի մահվան դեպքերին՝ ֆինանսավորելով Այնուր Զարրինթաջի հեղինակած ‘Onlar Yoxdur’ («Նրանք չկան») կարճամետրաժ ֆիլմը, որտեղ զինվորների անունները հնչելիս երևում են ոչ թե իրենք, այլ իրենց դատարկ ճտքավոր կոշիկները։ Զարրինթաջը ֆիլմը բնորոշում է որպես՝ «բանակում մահվան դեպքերի դեմ քաղաքացիական բողոքի մի ձև»՝ հավելելով, որ նման նախագծեր ապագայում էլ են լինելու։ Ֆիլմը YouTube-ում գրանցել է ավելի քան 30.000 դիտում։

Ադրբեջանի Կարմիր Խաչի միջազգային կազմակերպության (ԿԽՄԿ) ներկայացուցիչները մարտի 27-ին այցելել են ԼՂՀ ՝ադրբեջանցի ռազմագերի Ֆիրուզ Ֆարաջևին՝ տեղեկություն փոխանցելով նրա ընտանիքից։ Հիշեցնենք, որ Ֆարաջևը (ծն. 1992թ.) 2012-ի հուլիսի 26-ին հատել էր Հայաստանի պետական սահմանն ու հանձնվել։ ՊՆ խոսնակ Ա. Հովհաննիսյանի խոսքերով՝ զինծառայողը չի ցանկանում վերադառնալ Ադրբեջան։

[Vrej1915]

Re: Military Forces of the Republic of Armenia

Թշնամու գնդակը նրան չխոցեց, փոխարենն ընկավ հայ ոչ պակաս թշնամու գնդակից վիդեո
02/04

http://www.yerkirmedia.am/?act=news&lan=hy&id=13303

Այսօր առավոտյան Կոտայքի մարզի Պռոշյան գյուղի գյուղապետարանի մոտ մահափորձ է կատարվել գյուղապետ Հրաչ Մուրադյանի դեմ: Արձակված գնդակներից Հրաչ Մուրադյանը մահացել է:
Հրաչ Մուրադյանը շուրջ 10 տարի ղեկավարում էր Պռոշյան համայնքը:
Հրաչ Մուրադյանն այն հարյուր քաջերի մեջ էր, ովքեր 1988թ-ին միայն Պռոշյան համայնքից անդամագրվեցին Արցախյան ազատամարտին։ Հերոսական մասնակիցներից մեկն էր: Լեգենդար Պետրոս Ղեւոնդյանի հետ անցել էր ազատամարտի բոլոր ճակատներով՝ Շահումյանից մինչեւ Ֆիզուլի: Հրաչ Մուրադյանը 90 թվականից Դաշնակցության անդամ էր: Նրա շատ ընկերները զոհվեցին ազատամարտում թշնամու գնդակից։ Այդ գնդակը խնայեց նրան պատերազմի դաշտում, բայց արդեն ապրիլի 2-ի առավոտյան արձակված ոչ պակաս թշնական փամփուշտը չխնայեց խիզախ ազատամարտիկի, գործունյա ղեկավարի եւ պարզապես հիանալի մարդու կյանքը։
Հրաչ Մուրադյանի ընտանիքը 1966 թվականին Հայաստան է տեղափոխվել Սիրիայից: Նա ծնվել է 1963թ. հուլիսի 1-ին՝ Պռոշյան գյուղում, ավարտել տեղի միջնակարգ դպրոցը, բարձրագույն կրթություն ստացել Երանի "Մեսրոպ Մաշտոցի անվան համալսարանում": Ամուսնացած էր, ուներ երկու դուստր եւ երկու որդի:

"Մեր երկրի կառուցման համար չպետք է խնայենք ոչինչ, պետական մտածելակերպ դրսեւորենք եւ լավ հայ լինելու պատվին արժանանանք: Փոքր ազգ լինելու հանգամանքը մեզ ավելի պիտի պարտադրի հայրենասեր, ազգասեր ու միասնական լինել",-ասում էր Պռոշյանի գյուղապետը։

Հենց այս կարգախոսով էլ նա 2005 թվականից ղեկավարում էր Պռոշյանը։ Անցած տարի սեպտեմբերին կայացած ընտրություններում պռոշյանցիների մեծամասնությունը կրկին վստահեց Հրաչ Մուրադյանին։ Ի դեպ, Կոտայքի մարզում Հրաչ Մուրադյանը համարվում էր, կամ գրեթե այն միակ համայնքապետն էր, ով անկախ էր, ինքնուրույն, ինչը սովորաբար շատ քիչ կարելի է հանդիպել մեր օրերում։

"Կան կիսատ մնացած գործեր, ծրագրեր ու նախատեսումներ, որոնք իրենց հերթին են սպասում",- իր ծրագրերի մասին ասել էր Հրաչ Մուրադյանը։ Նախատեսում էր գյուղում մեծ զբոսայգի եւ խաղահրապարակ կառուցել: Նրա համար առաջնահերթ կարեւոր ու առանցքային էր մատաղ սերնդի կրթության, դաստիարակության խնդիրը։
Նման մարդը չէր կարող նաեւ անմասն մնալ Արցախյան ազատամարտից։ 2005 թվականից ղեկավարելով 5800 բնակիչ ունեցող Պռոշյան համայնքը՝ բազմաթիվ աշխատանքներ է իրականացրել: Մասնավորապես, 80 մլն դրամի ասֆալտապատման եւ 65 մլն դրամի գազաֆիկացման աշխատանքներ են կատարվել: Բացառապես բարերարների աջակցությամբ է իրականացվել բուժամբուլատորիայի, մարզադահլիճի եւ մանկապարտեզի վերանորոգումը, իսկ դպրոցի գազաֆիկացումն ու առանձին ջեռուցմամբ ապահովումը` համայնքապետարանի միջոցներով։ Նոր կոյուղագծեր են անցկացվել, այս ոլորտում ներդրված գումարի չափը հասնում է 14 մլն դրամի: Պռոշյան ավանի կենտրոնական փողոցում գիշերային լուսավորություն է անցկացվել, գյուղում խմելու ջրի մատակարարումը շուրջօրյա է, այստեղ խնդիրներ առաջանում են միայն հաճախակի պատահող վթարների դեպքում:

Նրա ուշադրության կենտրնում էին նաեւ սոցիալապես անապահով ընտանիքները՝ համայնքի բյուջեի միջոցներից մշտապես դրամական օգնություն էր հատկացվում սոցիալապես անապահով վիճակում գտնվող ընտանիքներին եւ ուսանողներին:

"Լավ գյուղապետ է եղել, շատ բան է փոխվել մեր Պռոշյանում։ Նա օգնում էր սոցիալապես անապահով ընտանիքներին։ Ուղղակի անսպասելի էր նրա մահը",- ասում է գյուղացիներից մեկը:

Հրաչ Մուրադյանը չափից ավելի սրտացավ էր գյուղին ու գյուղացուն վերաբերող ցանկացած խնդրում, մեծապես կարեւորում էր մատաղ սերնդի հայեցի դաստիարակության անհրաժեշտությունը։ Ի դեպ, նրա ղեկավարած համայնքը սերտ համագործակցում է ԼՂՀ-ի մի շարք բնակավայրերի, համայնքների հետ:
Դատապարտելով անարգ ոճիրը, ցավակցում ենք Հրաչ Մուրադյանի հարազատներին, ընկերներին եւ զինակիցներին: